سنڌو ميراڻي

سنڌو ميراڻي: چترڪار، اديب ۽ شاعر سنڌو ميراڻيءَ جو اصل نالو محمد صالح ولد محمد حسين ميراڻي هو، هن 15 فبروري 1948ع تي دادو شهر ۾ جنم ورتو. پرائمري ثانوي ۽ اعلى ثانوي تعليم دادوءَ مان حاصل ڪيائين. ايم.اي انگريزي (ادب) ۾ سنڌ يونيورسٽي، ڄام شوري مان ڪيائين، جنهن کانپوءِ ليڪچرار جي حيثيت سان مختلف ڪاليجن ۾ پڙهايائين. کيس 1977ع ۾ ڪيڊٽ ڪاليج پيٽاري ۾ ليڪچرر مقرر ڪيو ويو. شهيد ذوالفقار علي ڀٽي کي جڏهن ڦاسي ڏني وئي ته هن سندس جنازي نماز پڙهائڻ جا انتظام ڪيا ۽ هڪ جنازي نماز جو پاڻ پيش امام به ٿيو، جنهنڪري ضياء الحق انتظاميه کيس نوڪريءَ مان ڪڍي ڇڏيو، جنهن کانپوءِ هو مسلسل ان جدوجهد ۾ رهيو ته سندس ملازمت بحال ٿئي پر کيس نوڪريءَ تي بحال نه ڪيو ويو ۽ مايوس ٿي هن پيٽ پالڻ لاءِ مختلف ڪاروبار ڪيا، جن ۾ هن ڀان سعيدآباد ۾ ميڊيڪل اسٽور تي ملازمت ڪرڻ، ميڻ بتيون ٺاهڻ کان وٺي پڪوڙن ترڻ تائين جو ڪم ڪيو، جنهن کانپوءِ هن دادو شهر ۾ هڪ پريس کولي، جنهن مان هن ’ليکڪ‘ ۽ ’امرتا‘ نالي ٻه رسالا شايع ڪيا. آخري وقت ۾ مارڪيٽ روڊ دادوءَ تي قبرن تي ڪتبن اڪيرڻ ۽ لکڻ جو دڪان هئس، جتي هو ڪتبا اڪيريندو هو. انهيءَ فن ۾ کيس وڏي دسترس هئي.
سنڌو ميراڻيءَ، 1962ع کان ادبي دنيا ۾ پير پاتو. سٺو ڊرائنگ ماسٽر هو. سندس وڏي سڃاڻپ ڪارٽونسٽ طور هئي. هن جا ڪارٽون سنڌيءَ جي سمورن رسالن ۽ اخبارن ۾ ڇپيا هئا. هن ڪهاڻيون ۽ ڪيترا مضمون به لکيا، شاعري به ڪيائين. سندس هڪ سائيڪو اسٽائيل ڪارٽون جو ڪتاب به شايع ٿيل آهي، جڏهن ته سندس شعري مجموعو ۽ طب تي ڪتاب اشاعت هيٺ اچي نه سگهيا آهن.
هن 1988ع جي اليڪشن ۾ پي. ايس 74 تي اڳوڻي وزير تعليم پير مظهرالحق جي سامهون آزاد اميدوار طور فارم ڀرايو ۽ سائيڪل تي چڙهي پنهنجي اليڪشن مهم هلائي، پر کيس ناڪامي حاصل ٿي.
سال 2003ع ۾ کيس دم جي تڪليف وڪوڙي ورتو، ان تڪليف ۾ هن 10 سال گذاريا، ۽ 15 سيپٽمبر 2013ع تي وفات ڪيائين.

داخلا ۾ استعمال ٿيل تاريخون

1948.02.15  عيسوي

چترڪار، اديب ۽ شاعر سنڌو ميراڻيءَ جو اصل نالو محمد صالح ولد محمد حسين ميراڻي هو، هن 15 فبروري 1948ع تي دادو شهر ۾ جنم ورتو.

2013.09.15  عيسوي

سنڌو ميراڻي 15 سيپٽمبر 2013ع تي وفات ڪئي.

اديب - ڀاڱي جون ٻِيون داخلائون